اسرائیل ایران پر بمباری سے باز رہے، صدر ٹرمپ
واشنگٹن (نیوز ڈیسک) — امریکی صدر ڈونلڈ ٹرمپ نے اسرائیل کو خبردار کیا ہے کہ اگر اس نے ایران پر بمباری کی تو یہ جنگ بندی کی سنگین خلاف ورزی تصور کی جائے گی۔
سوشل میڈیا پلیٹ فارم “ٹروتھ سوشل” پر جاری اپنے پیغام میں صدر ٹرمپ نے اسرائیل کو براہ راست مخاطب کرتے ہوئے کہا:
> “بم نہ گرائیں، اگر آپ نے ایسا کیا تو یہ ایک بہت بڑی خلاف ورزی ہوگی۔ اپنے پائلٹس کو فوراً واپس بلائیں۔”
صدر ٹرمپ کا یہ بیان اس وقت سامنے آیا جب اسرائیل نے دعویٰ کیا کہ جنگ بندی کے نفاذ کے کچھ دیر بعد ایران کی جانب سے دو میزائل داغے گئے، جنہیں کامیابی سے تباہ کر دیا گیا۔ جواب میں اسرائیلی وزیر دفاع نے ایران پر سخت جوابی کارروائی کا عندیہ دیا تھا۔
ڈونلڈ ٹرمپ نے اس کشیدہ صورتِ حال میں فریقین کو تحمل کا مظاہرہ کرنے کی تلقین کرتے ہوئے کہا کہ خطے میں مزید کشیدگی عالمی امن کے لیے خطرناک ثابت ہو سکتی ہے۔
