پنجاب بھر میں اسکولوں کے لیے موسم گرما کی تعطیلات کا شیڈول جاری
لاہور (نیوز ڈیسک – لاہور میں تعلیمی اداروں سے وابستہ بچوں اور والدین کے لیے خوشی کی خبر سامنے آئی ہے۔ شدید گرمی کی لہر کے باعث محکمہ تعلیم پنجاب نے اسکولوں میں موسم گرما کی تعطیلات کا باضابطہ اعلان کر دیا ہے۔ بڑھتے ہوئے درجہ حرارت کو مدنظر رکھتے ہوئے یہ فیصلہ کیا گیا ہے تاکہ بچوں کی صحت اور تعلیمی سرگرمیوں کو ممکنہ نقصان سے بچایا جا سکے۔
محکمہ تعلیم کی جانب سے جاری کردہ اعلامیے کے مطابق، صوبے بھر کے تمام اسکولوں میں یکم جون سے موسم گرما کی تعطیلات کا آغاز ہوگا۔ سیکرٹری اسکول ایجوکیشن پنجاب، خالد نذیر وٹو نے میڈیا سے گفتگو کرتے ہوئے بتایا کہ موجودہ حالات میں تعطیلات کا شیڈول ترتیب دیا گیا ہے، تاہم اگر گرمی کی شدت میں مزید اضافہ ہوا تو چھٹیاں شیڈول سے پہلے بھی دی جا سکتی ہیں۔
حکام کے مطابق، فیصلہ والدین، اساتذہ اور طلبہ کی صحت کو مدنظر رکھتے ہوئے کیا گیا ہے۔ غیر معمولی درجہ حرارت تعلیمی سرگرمیوں پر براہ راست اثر انداز ہوتا ہے اور بچوں کی فلاح کے لیے احتیاطی تدابیر اپنانا ناگزیر ہے۔ اسی وجہ سے محکمہ تعلیم نے تمام اضلاع کو خصوصی ہدایات جاری کر دی ہیں کہ اگر مقامی سطح پر گرمی کی شدت حد سے تجاوز کرے تو فوری طور پر تعطیلات کا شیڈول تبدیل کرنے پر غور کیا جائے۔
دوسری جانب ماہرین موسمیات کا کہنا ہے کہ پاکستان گلوبل وارمنگ کے اثرات سے شدید متاثر ہو رہا ہے۔ موسمیاتی تبدیلیوں کے باعث نہ صرف گرمی کی شدت میں غیر معمولی اضافہ دیکھنے میں آیا ہے بلکہ تعلیم، صحت اور معیشت پر بھی اس کے مضر اثرات مرتب ہو رہے ہیں۔ موجودہ صورت حال میں ایسے فیصلے ناگزیر ہو گئے ہیں تاکہ انسانی جانوں کو شدید موسم کے اثرات سے محفوظ رکھا جا سکے۔
والدین کی جانب سے حکومت کے اس فیصلے کو سراہا جا رہا ہے، اور کئی تعلیمی ماہرین نے بھی شدید گرمی میں اسکولوں کی بندش کو وقت کی ضرورت قرار دیا ہے۔ شہریوں کا کہنا ہے کہ اس اقدام سے بچوں کی صحت پر مثبت اثرات مرتب ہوں گے اور تعلیمی سال کا بقیہ حصہ بہتر انداز میں آگے بڑھایا جا سکے گا۔
