ٹک ٹاکر ثنا یوسف کو کس نے قتل کیا؟ اہم تفصیلات سامنے آگئیں
اسلام آباد (ویب ڈیسک) وفاقی دارالحکومت اسلام آباد میں سوشل میڈیا سے جڑی ایک ہولناک کہانی سامنے آئی ہے، جہاں ٹک ٹاکر ثنا یوسف کو اسی کے سوشل میڈیا دوست نے گولی مار کر قتل کر دیا۔ مقتولہ کا تعلق اپر چترال سے تھا، جب کہ ملزم کی شناخت عمر حیات عرف “کاکا” کے نام سے ہوئی ہے، جو خود بھی ٹک ٹاک پر فعال تھا۔
قاتل کا فرار اور گرفتاری
واردات کے بعد ملزم نے اپنے ٹک ٹاک اکاؤنٹ کی آئی ڈی تبدیل کر لی تاکہ شناخت چھپائی جا سکے۔ لیکن پولیس نے جدید ٹیکنالوجی، سی سی ٹی وی فوٹیج اور تکنیکی ذرائع سے اس کا سراغ لگا کر فیصل آباد سے گرفتار کر لیا۔
قتل کی منصوبہ بندی
ابتدائی تفتیش میں یہ بات سامنے آئی ہے کہ قتل منصوبہ بندی کے تحت کیا گیا، کیونکہ واردات کے وقت گھر میں والدین اور بھائی موجود نہیں تھے، صرف مقتولہ کی پھوپھو دوسرے کمرے میں تھیں۔
پھوپھو کے مطابق، ثنا اور عمر کے درمیان کسی بات پر تلخ کلامی ہوئی۔ ثنا نے اسے ٹھنڈا رہنے کا کہا اور یہ بھی یاد دلایا کہ گھر کے اندر اور باہر کیمرے لگے ہوئے ہیں، تاہم ملزم نے سب کچھ نظرانداز کرتے ہوئے ثنا کو گولی مار دی، جو اس کے جسم میں لگی اور وہ موقع پر ہی شدید زخمی ہو گئی۔
فرار کی تفصیلات
رپورٹ کے مطابق، ملزم چھت پر موجود فیملی کے حصے تک سیڑھیوں سے چڑھ کر آیا، اور فائرنگ کے بعد گلی کے کونے تک دوڑتا ہوا گیا، جس سے شبہ ہوتا ہے کہ باہر کوئی سواری اس کے انتظار میں تھی۔ وہ موٹروے سے کشمیر ہائی وے کے ذریعے فیصل آباد پہنچا اور روپوش ہو گیا۔
شواہد اور اعتراف جرم
پولیس کا کہنا ہے کہ قتل کی مکمل واردات سی سی ٹی وی کیمروں میں محفوظ ہو گئی ہے، جس میں ملزم کو جائے وقوعہ سے فرار ہوتے دیکھا جا سکتا ہے۔ گرفتار ملزم نے ابتدائی بیان میں جرم کا اعتراف بھی کر لیا ہے۔
اب ملزم کو اسلام آباد منتقل کیا جا رہا ہے، جہاں مزید تفتیش جاری ہے۔ دوسری جانب، مقتولہ کی میت ان کے آبائی علاقے اپر چترال روانہ کر دی گئی ہے۔ سوشل میڈیا پر ثنا یوسف کے چاہنے والوں نے شدید دکھ اور افسوس کا اظہار کیا ہے اور قاتل کو سخت سزا دینے کا مطالبہ کیا جا رہا ہے۔
