فرانسیسی صدر کا فرانس-انڈونیشیا معاہدے کے تحت رافیل طیاروں کے آرڈرز کا اشارہ
جکارتہ (ویب ڈیسک) فرانس اور انڈونیشیا نے ایک ابتدائی دفاعی معاہدے پر دستخط کر دیے ہیں، جس کے تحت فرانس سے رافیل لڑاکا طیارے، سکورپین آبدوزیں اور دیگر فوجی ساز و سامان کی خریداری ممکن ہو سکتی ہے۔ یہ بات فرانسیسی صدر ایمانوئیل میکرون نے بدھ کے روز انڈونیشیا کے صدر پرابوو سبیانتو کے ہمراہ ایک مشترکہ پریس کانفرنس میں کہی۔
صدر میکرون نے کہا، “مجھے خوشی ہے کہ آج دستخط کی گئی نیت کی دستاویز (Letter of Intent) نئے امکانات کے دروازے کھول سکتی ہے، جن میں رافیل طیاروں، سکورپین آبدوزوں اور ہلکی فریگیٹس کی نئی خریداری شامل ہے۔”
انڈونیشیا کے صدر پرابوو سبیانتو نے کہا کہ فرانس ان کے ملک کا ایک اہم دفاعی شراکت دار ہے، جو نہ صرف فوجی ساز و سامان کی فراہمی میں بلکہ مشترکہ پیداوار اور ٹیکنالوجی کی منتقلی کے ذریعے انڈونیشیا کی دفاعی صنعت کو ترقی دینے میں مدد دے رہا ہے۔
فرانسیسی صدر ویتنام کے دورے کے بعد منگل کی شب جکارتہ پہنچے اور اب وہ جمعرات کو سنگاپور روانہ ہوں گے۔
11 ارب ڈالر کے معاہدے اور مفاہمتی یادداشتیں
فرانس اور انڈونیشیا کے درمیان 11 ارب ڈالر سے زائد مالیت کے مختلف معاہدے اور 20 سے زیادہ مفاہمتی یادداشتوں (MoUs) پر بھی دستخط کیے گئے۔ انڈونیشیا کے چیف اکنامک منسٹر نے کاروباری فورم میں بتایا کہ یہ شراکت داری دونوں ممالک کے لیے سودمند ثابت ہوگی۔
دفاعی معاہدوں کے علاوہ انڈونیشیا نے 2024 میں فرانس کی سرکاری شپ یارڈ کمپنی Naval Group کے ساتھ دو سکورپین آبدوزیں خریدنے کا معاہدہ کیا، جبکہ 2023 میں فرانس کی کمپنی Thales سے 13 طویل فاصلے کے فضائی نگرانی ریڈارز کی خریداری کا بھی اعلان کیا گیا۔
رافیل طیاروں کے 2022 کے معاہدے کے تحت ابھی تک انڈونیشیا کو کوئی طیارہ موصول نہیں ہوا۔ انڈونیشی فضائیہ کے سربراہ محمد ٹونی ہرجونو نے فروری میں کہا تھا کہ ابتدائی چھ رافیل طیارے 2026 کے اوائل میں انڈونیشیا کو فراہم کیے جائیں گے۔
رافیل طیاروں کی کارکردگی پر سوالات
حال ہی میں پاک-بھارت فضائی جھڑپوں کے دوران پاکستان کے چینی ساختہ طیاروں نے بھارتی فضائیہ کے زیرِ استعمال رافیل طیاروں کو نشانہ بنایا تھا، جس کے بعد رافیل کی کارکردگی پر سوالات اٹھنے لگے۔ اس واقعے کے بعد رافیل بنانے والی فرانسیسی کمپنی “ڈاسو ایوی ایشن” (Dassault Aviation) کے حصص میں واضح کمی دیکھنے میں آئی تھی، جو سرمایہ کاروں کے اعتماد میں کمی کی علامت سمجھی گئی۔
کان کنی اور توانائی کے شعبے میں تعاون
فرانسیسی کان کنی کمپنی Eramet اور انڈونیشیا کے خودمختار سرمایہ کاری فنڈز Danantara اور INA کے درمیان ایک اور اہم معاہدے پر دستخط کیے گئے ہیں، جس کا مقصد نکل (Nickel) کے شعبے میں مکمل ویلیو چین یعنی کان کنی سے لے کر تیار مصنوعات تک سرمایہ کاری کے امکانات کا جائزہ لینا ہے۔ یہ شراکت داری الیکٹرک گاڑیوں (EVs) کی بیٹریز کے لیے خام مال کی تیاری پر مرکوز ہوگی۔
بیان میں کہا گیا کہ ابتدائی جانچ پڑتال کے بعد ممکنہ منصوبے طے کیے جائیں گے تاکہ اس اسٹریٹجک شراکت داری کو عملی جامہ پہنایا جا سکے۔
