بغیر نادرا دفتر جائے، ب فارم کیسے بنوائیں؟ نیا آن لائن طریقہ سامنے آگیا
لاہور (ویب ڈیسک) — اگر آپ والدین ہیں اور اپنے بچے کا ب فارم حاصل کرنا چاہتے ہیں تو اب نادرا دفاتر کے طویل چکروں کی کوئی ضرورت نہیں رہی۔ نیشنل ڈیٹا بیس اینڈ رجسٹریشن اتھارٹی (نادرا) نے ایک نئی آن لائن سروس متعارف کروا دی ہے، جو خاص طور پر ایک سال سے کم عمر بچوں کے لیے دستیاب ہے۔
اب والدین گھر بیٹھے اپنے موبائل فون یا کمپیوٹر کے ذریعے ب فارم کی درخواست دے سکتے ہیں۔ نادرا کی ’پاک آئی ڈی‘ موبائل ایپ یا ویب پورٹل کے ذریعے بچے کی رجسٹریشن کا مکمل عمل چند آسان مراحل میں مکمل کیا جا سکتا ہے۔
رجسٹریشن کا مرحلہ وار طریقہ:
-
سب سے پہلے Pak-ID ایپ یا ویب سائٹ پر اکاؤنٹ بنائیں یا لاگ ان کریں۔
-
’درخواست دیں‘ کے آپشن میں جائیں اور ’شناختی دستاویز کے اجرا‘ کا انتخاب کریں۔
-
’چائلڈ رجسٹریشن سرٹیفکیٹ‘ منتخب کریں اور اپنی معلومات درج کریں۔
-
بچے کی تصویر اپ لوڈ کریں یا براہِ راست ایپ سے کھینچیں۔
-
والدین کے دستخط اور بچے کی تمام تفصیلات مہیا کریں۔
-
مطلوبہ دستاویزات اپ لوڈ کریں اور کسی ایک والد یا والدہ کے بایومیٹرک فنگر پرنٹس کی تصدیق کریں۔
-
مکمل چیک کرنے کے بعد فارم جمع کروا دیں۔
فیس کی تفصیل: عام سروس کے ذریعے ب فارم حاصل کرنے کی فیس صرف 50 روپے ہے، جبکہ فوری ضرورت کے لیے ’ایگزیکٹو سروس‘ کی فیس 500 روپے مقرر کی گئی ہے۔
یاد رکھیں کہ یہ سہولت صرف ایک سال سے کم عمر بچوں کے لیے دستیاب ہے۔ اگر بچہ ایک سال سے زیادہ عمر کا ہو تو رجسٹریشن کے لیے والدین کو قریبی نادرا دفتر جانا ہوگا۔
